Астана қаласы мәслихатының депутаттары «Жол қозғалысын ұйымдастыру орталығы» ЖШС-ге (ЖҚҰО) барды. Сапар барысында халық сайлаған адамдарға кәсіпорынның ағымдағы қызметі туралы есеп және астананың көлік инфрақұрылымын дамытудың 2028 жылға дейінгі стратегиялық жоспары ұсынылды.
12 мобильді автоматтандырылған бағдарламалық кешеннің (АБК) жұмысымен таныса отырып, депутаттар құқық бұзушылықтардың ауқымын көрді: күн сайын жүйе жол қозғалысы қағидаларын бұзудың 1,5 мыңнан астам жағдайын тіркейді. Бұл статистика жолдардағы жүргізушілердің жаппай жауапсыздығын көрсетеді.
Бұзушылықтардың мұндай саны қалалық логистикаға тікелей зиян келтіреді. Белгіленбеген орында тасталған автомобильдер көшелердің өткізу қабілетін күрт төмендетеді, бұл «жасанды кептелістердің»пайда болуының басты себептерінің біріне айналады. Бұл трафикті тоқтатады және көлік желісінің қалыпты жұмыс істеуіне жол бермейді.
Ретсіз орынтұраққа қойылған көлік құралдары қолайсыздықты тудырып қана қоймай, нақты қауіп төндіреді. Олар жаяу жүргіншілерді жолдың жүру бөлігіне шығуға мәжбүр етеді және ең маңыздысы, жедел жәрдем мен өрт сөндіру қызметтері машиналарының өтуі үшін тосқауыл қояды. Бұл тұрғыда цифрлық бақылау жолдарды жобалық тиімділігіне қайтарудың қажетті құралы болып табылады.
Әлеуметтік объектілердің жанындағы жағдай ерекше алаңдаушылық тудырады. Қаланың міндеті олардың айналасында қауіпсіз маршруттар құру болып табылады. Мұнда автомобильдер – жоғары қауіптің ықтимал құралы. Жаяу жүргіншілер өткелдерінде және белгіленбеген орындарда қалдырылған автомомбильдер қозғалыс қатысушыларын бір-біріне «көрінбейтіндей» етіп, «соқыр аймақтар» тудырады.
Дәл осы қалыптасқан жағдайда бұзушылардың көлік құралдарын эвакуациялау бойынша басталған жұмыстың уақтылығы айқын болуда. Тек 2026 жылғы 25 сәуірден бастап осы қысқа мерзім ішінде зиянды бұзушылардың көлік құралдарының орнын ауыстыруға 400-ден астам өтінім пысықталды.
Депутаттар қаланың реттелетін аймағын бақылаумен қамтуды ұлғайту үшін ЖҚҰО көлік құралдары паркін кеңейту қажеттілігін атап өтті. Барлық коммуналдық орынтұрақ аймақтарын басқару ЖҚҰО-ның қарамағына өтетінін назарға ала отырып, жақын арада қала тұрғындарына ыңғайлы болу үшін орынтұрақ кеңістіктерінің ауданын кеңейту жоспарлануда.
Кездесу соңында ЖҚҰО жұмысы қаланың өткізу қабілетін, астана тұрғындары мен қонақтарының жүріп-тұру қауіпсіздігін және жайлылығын арттыруға бағытталғаны ерекше атап өтілді. Келіп түскен барлық пайда абаттандыруға, инфрақұрылымды дамытуға және Астананың қалалық ортасының қауіпсіздігін арттыруға бағытталатын болады.
